Sant-Sakremant
Incomplet
Pédenn-digor :
Aotrou Jezuz Krist,
vennet a hues leskel genom ar Sakremant burhuduz-man
aveid ma talhéem sonj ag ho Pasion.
Groeit enta, ni ho ped, én arben ag an énour a zougam
d'ho Korv santél ha d'ho Koêd presiuz,
ma veem lodeg heb àrsaù é frouéh ho salvedigeh.
Hwi hag a viù èl Roué ged Doué an Tad hag ar Spered Santél,
a oll viskoah de virùikén. AMEN.
Psalm 147
Pobl an Aotrou Doué, kanet an Aotrou
Jéruzalem, mélet an Aotrou Doué ;
mélet Doué, o Sion.
Rag m'en-des lakeit splahoù sonn doh ho torioù
ha kresket ar vugalé én ho tiér.
Dégaset en-des ar peah ér vro, tro ha tro deoh
ha maget ho pugalé ged ar bara huékan.
Rein a hra é hourhemennoù d'an dud,
ha kentèh é vé sentet dohté.
Ean a gomz de ligné Jakob
aveid rein dehi é lézenn hag é hourhemennoù.
N'en-des ket groeit kement arall d'an oll bobloù
ha n'en-des disklériet elsé é hourhemennoù d'an oll.
Ketan lihér an Apostol sant Paol de Gristenion Korint (1Co 10, 16-17).
Mem breudér,
ar gwin benniget a ivam ér halis aveid trugérékaad an Aotrou Doué
a zo é gwirioné Goêd ar Salvér Jézuz Krist.
Ar bara konsakret a zèbram a zo é gwirioné Korv or Salvér Jézuz Krist.
Nen des nameit ur varaenn hebkèn,
ha ni oll zo é tèbrein ar varaenn-sé,
ni zo ur Horv hebkèn, Korv santél or Salvér Jézuz Krist.
Proz
Chetu deit ar bara an Elé
d'or magein àr an hent d'an né,
Bara miret d'ar vugalé ;
Nen dé ket eid al loned.
Kalz a draoù en-doé er spizet,
El Izaak sakrifiet,
Oén-Pask tré an dud lodennet,
hag ar mann reit d'ar Juifed.
Bugul mad, biùans a vuhé,
Jézus, dohom ho péet truhé :
Maget, diwennet-ni bamdé,
Reir deom kaved peb leùiné,
Genoh én ho eurusted.
O hwi hag hel gobér peb tra,
a venn ér bed boud or bara,
Reit deom, én dro d'ho taol,
En néañv kanein alleluia, enta,
Ged ar sent hag an Eled.
Elsé revo groeit.
Aviél revé Sant Iehann (Jn 6, 51-58)
Goudé boud maget ur vostad tud én deserh,
ged pemp baraenn ha daoù besk, Jézuz a laras dehé :
Mé é ar bara biù dichennet ag an nean.
An neb a zèbr anehon a viùo de virvikén.
Ar bara a rein mé a zo me horv, reit aveid buhé ar bed.
Mes étré zé, ar Juifed a vreté én ul laret :
Penaos é hell hennen rein deom é gorv de zèbrein ?
Jézuz a laras neuzé dehé :
E gwirioné, é gwirioné, m'el lar deoh :
ma ne zèbret ket korv Mab an dén,
ha ma ne ivet ket é hoêd, n'ho po ket ar vuhé énnoh.
An hani a zèbr me horv hag a iv men goêd,
En-des ar vuhé peurbaduz,
ha m'er saùou a varù de viù én dé devéhan.
Rag me horv a zo ur gwir biùans
ha men goêd a zo ur gwir ivaj.
An hani a zèbr me horv hag a iv men goêd
a chom énan ha mé énnon.
El m'en-des an Tad hag a zo ar vuhé énnon men degaset,
ha ma viùan dré an Tad,
elsé an hani em dèbr a viùo ean eùé drézon.
Elsé é ar bara a zichenn ag an nean.
Né ket èl ar mann en-des ho tadoù dèbret,
ha neoah é mant marù.
An hani a zèbr ar bara-man a viùo de virvikén.
Pedenn àr ar provoù.
Pédam an Aotrou Doué,
Aotrou Doué on Tad,
reit d'ho Iliz ar hrès de viùein é peah hag unannet ér garanté,
hrevé ar péh a senefi ar provoù-man kenniget deoh,
Dré Jézus-Krist, or Salvér
Pédenn goudé ar gomunion :
Reit a hues deom, Salvér Jézuz, ar hrès de zèbrein ha de ivet
ho Korv santél ha ho Koêd présiuz é Sakremant an Aotér.
Lakeit-ni de voud un dé lodeg genoh é leùiné ar Baradouiz,
a oll viskoazh de virùikén