23ved sulieg

Pedenn de zigor

 

Aotrou Doué en-des kaset ho Mab eid or salvein ha gober genom ho pugalé, sellet ged madelezh ar ré a garet èl un tad . El ma kredam ér Hrist, dakoret deom ar gwir frankiz hag ar vuhé peurbaduz.
Dré…

 


Pennad tennet a Livr Ezékiel

 

Doué a gomzas dohein :
Mab-dén, groeit em-es ahanoh ur gédour eid Ti Izrael.
Pe gleùeet ur gomz a men genoù, hwi o belzo a me ferh.
Ma laran d’an hani fall : éh oh é verùel, ha ma n’er belzo ket, ma ne laret ket dehon distroein ag an hent fall, ean, an dén fall a varùo a-ziàr é béhed, med genoh é houlenein kont ag é hoed.
E kontrél, mar belzet an hani fall ha dilézel an hent fall, ha ma ne zistro ket anehon, ean a varùo a-ziàr é béhed, med hwi ho-po salvet ho puhé

 

 

Psalm 94


Digoret ho kalon doh boéh an Aotrou

Hiziù, ne cherret ket ho kalon
med chelaouet doh boéh an Aotrou.


Dam de youhal aveid an Aotrou,
Aveid or roh, or salvedigezh !
Dam betagzon én ur rantein grès dehon.
Ged or sonennoù groam fest dehon !

 

Deit, stouiet ha daoùlinet !
Adoram an Aotrou, or Hrouéour.
Ya ! Ean é on Doué ;
Ha ni, é bobl ambrouget drézon.

 

Hiziù, ha hwi a gleùo é gomzoù ?
Ne cherret ket ho kalon él én dézerh,
Léh m’en-doé me zentet ho tadoù
ha neoah o-doé ind gwélet me obéroù kaer.

 


Pennad tennet a lihér Sant Paol d’ar Roméned

 

Mem bredér, ne véet ket é delé de hanni, nameid a-fed ar garanté a zeliér an eil d’égilé ; rag an neb a gar é nésan a zo kuit doh al lézenn.
Chetu ar péh a lar al lézenn :
N’avoultri ket ; ne lahi ket ; ne laeri ket ; ne ranti ket testoni é gaoù ; ne hoanti ket nitra diwennet ; ha kement gourhemenn a zo a du-rall, razh émant ér gomz-man : hwi a garo ho nésan èldoh hos unan. An hani a gar é nésan ne hra droug erbet.
Nezé, razh al lézenn é ar garanté.

 

 

Alleluia


Er Hrist, en-des Doué groeit ar peah étrézon hag ar bed. Lakeit en-des én or genoù Komz ar peah.

 

 

Aviél Jézus-Krist revé sant Maheu


En amzér-hont, Jézus a laré d’é zisipled :
« Ma en-des ho preur péhet éneb deoh, kerh ha kelen ean étrézoh, é unan ha hwi. Mar chelaou dohoh ho-po gouniet ho preur. Med ma ne chelaou ket dohoh, kemér hoazh genoh unan pé daou eid ma vo groeit an traoù diàr gomz daou pé tri test.
Ha ma ne chelaou ket dohté, laret d’an Iliz.
Med ma chelaou ket doh an Iliz, sellet ean èl ur paian hag ur publikan.
E gwirioné, m’el lar deoh, oll ar péh a arieet àr an douar a vo ariet én néañv hag oll ar péh a ziarieet àr an douar a vo diariet én néañv.
M’el lar deoh hoah, mar da daou ahanoh hag en em gleùed àr an douar, ne vern petra a houlenneint, ind en-do ean ged me Zad a zo én néañv.
Rag él léh m’en-des daou pé tri tolpet é me hanù, éno é ven én o hreiz. »

 

Pedenn àr ar provoù

 

Aotrou Doué a ra deom ar hrès d’ho servijein ged reizhted ha de hlask ar peah, groeit ma vo ar prov-man ur meleudi deoh hag, én ur gemér perh én overenn santél, ma vo kriùoh étrézom liammoù on unanded
Dré..

 

Pedenn goudé ar gomunion

 

Maget mad ha kriùeit ho-pes ho pugalé, Aotrou Doué, ged ho komz hag ho para ; reit deom tennein a vad ag an donezonoù-sé hag é vam lodeg berped de vuhé ho Mab karet.
Dré…