Eilved sul a Goareiz

 


Pedenn digor

 

Laret ho-pes deom, Aotrou Doué, chelaou ho Mab karetan ; groeit ma kaveem én ho komz ar magadur en-des hoant anehon or fé. Elsé, é vo glan a-walh or sell aveid gwéled ho kloér.

 


Pennad tennet a livr ar Heneliezh

 

En amzér-hont, é komzé an Aotrou Doué de Abraham én ur weledigezh. Ean er hasas ér méz ha laras dehon :
« Sellet doh an èbr ha kontet ar steredennoù, mar gellet ».
Ha ean a zisklérias :
« elsé é vo ho ligné ».
Abram en-des bet fé én Aotrou Doué, hag én arbenn d’an dra-sé, éma bet laret dén just ged an Aotrou Doué.
Ha ean a laras hoah :
« Me zo an Aotrou, me em-es ho tennet a gér Our é bro Kaldé aveid gober ahanoh perhenn ar vro-man ».
Abram a reskondas :
« Aotrou, men Doué, penaos é ouiein mé ma on-mé perhenn dehi ? »
An Aotrou Doué a laras dehon :
« Kemeret aveidon-mé un añnoér, unan tri blé, ur haor tri blé, ur maout tri blé, un durhunell ha ur glommig ».
Abram a geméras oll al loned-sé, o rannas é diù lodenn, hag o lakas beb hanterenn an eil dirag é gilé ;
Mes ne rannas ket al laboused.

El ma tiskenné an éned-preih àr ar horvoù, o chouein a hras Abram.

De guzh héol, é kouéhas àr Abram ur housk ponner hag un ankin spontus.
Ur wezh ma oé oeit de guzh an héol, deit téolded tiù.
Nezé, éh es bet gwélet un tan braz lan a voged hag ur flammenn é tremén étré an hanterennoù loned.
An dé-sé, en-des an Aotrou Doué groeit un emgleù ged Abram én ul lared :
« D’ho ligné, é rein ar vro-man, adal Goah an Ejipt dedal Stér-braz an Eufrat ».

 

 

Psalm 26

An Aotrou Doué é me sklerdér ha me salvedigezh


An Aotrou Doué é me sklerdér ha me salvedigezh :
Più  a hellehen-mé doujein ?
Doué é men diwennour :
Dirag più é krenehen-mé ?

 

Chelaouet, men Doué boéh me fedenn a saù trémazoh ;
Ho-peet truhé dohein ha deit d’em sekour.
Laret em-es deoh a galon :
men daoulagad en-des ho klasket


hwi mem é, o men Doué, a glaskein perpet gwéled
Ne zistroeit ket ho taoulagad azohon
Ha ne bellet ket doh ho servitour ho kounnar
N’em laosket ket heb me sekour.

 

Me gred é tei dein gwéled madoù an Aotrou Doué é bro ar ré a viù.
O m’inéan, lak ah fians én Aotrou Doué ;
Kemér nerh ha konfort,
Ha lak ah gonfians énnon

 

 

Pennad tennet a lihér Sant Paol d’ar gristenion a Filip.

 

Mem bredér,
keméret skwir diàrnon, ha sellet mad doh ar ré a jaoj o buhé doh ar péh a-hues gwélet genein. Rag boud a zo éleizh, komzet em-es deoh anehé liès, me gomz hoah anehé breman, an dar é men daoulagad, boud a zo éleizh hag a viù èl énéberion de groéz Jézus-Krist : ar ré-sé a ia de goll àrlerh ar vuhé-man ; n’o-des kén doué meid o hov ; ind a lak o gloér én traoù a hra méh, hag oll o sonjoù a zo aveid an douar.

Mes aveidom-ni, or gwir bro a zo én néan : a énno é hortam ma tei or Salvér Jézus-Krist aveid reneùein or horv, breman é stad ken izéleg, hag en troein de voud hanval doh é gorv glorius, dré ar gelloud en-des de lakad peb tra de blégein dehon.
Ragsé, mem bredér a garanté, hwi me oll hoant, me leùiné ha me houronenn, chomet sonn é grès Doué, èl m’em-es el laret deoh, bredér karet.

 


Youhadenn

 

A greiz ar gogusenn lugernus
doned a hras boéh an Tad a laré : « hennen é me mab karetan ;
Chelaouet dohton » ;

 


Aviél Jézus-Krist revé sant Lukas

 

En amzér-hont, Jézus a gemér geton ,Pièr, Jak ha Iehann é vreur, hag o has o unan a kosté àr ur mané ihuél aveid pedein. Hag épad ma oé é pedein, ean oeit ha chanjet diragté. E fas a za de vout lugernus èl an héol, hag é zilhad de vout luéhus ha gwenn kann èl an erh. Ha chetu é tiviz ged Jézus daou zén : Moïz hag Eli. Doh en em ziskoein én o gloér, ind a gomzé geton ag ar marù a zelié andur é Jéruzalem.

 

Neoah, Pier hag ar ré oé geton a oé hernet ged ar housked. Pe oent dihunet, ind a wélas é hloér hag an naou zén a oé étaldon. Hag èl ma yé an naou zén-man kuit, oeit Pièr ha lared de Jézus : « Mestr, mad é deom boud aman. Mar karet, ni a hrei tér koban, unan deoh-hwi, unan de Voïz hag unan arall de Eli. » Rag ne ouié ket petra a laré.
Tré ma oé hoah é komz elsé, chetu deit ur gogusenn lugernus d’o golein. Hag é voned ér gogusenn, ind a gréné. Doned a hras nezé ag ar gogusenn ur voéh hag a laré : « hennen é me mab karetan ; an Hani em-es dibabet. Chelaouet dohton».

Mes tré ma oé ar voéh é komz, Jézus en em gav é unan kaer.
Gouarn a hrant kement-sé geté hag an déioù-sé ne larant nitra de zén ag ar péh o-doé gwélet.

 

 

Pedenn àr ar provoù

 

Plijet genoh Aotrou Doué, ma glaña ar prov-man ag or péhédoù ha santéla korv hag inéan ho tud fidél hag o laka de voud é stad de lidein gouélioù ar Pask.

 

 

Préfas

 

E gwirioné, Tad santél,
 Doué oll-gelloudeg ha peurbaduz
 un dra just ha déliet é ho trugérékad
 é peb léh hag é peb amzér
 dré Jézus-Krist, or Salvér.

Goudé en-devoud laret d’é zisipled penaos é varùo, Jézus o hasas àr ar mané santél ;
Dirag Moïz hag Eli ar profet, ean en em ziskoas dehé én é hloér
Elsé é tiskoé deom penaos é Basion a yé d’er has betag gloér é adsaù

Rag-sé, unanet ged an Eled ag an néañv,
 é hellam ho pennigein àr an douar hag ho adorein én ur ganein

Santél...

 

 

Pedenn goudé ar Gomunion

 

Goudé en-devoud keméret perh de vistérioù ho kloér, Aotrou Doué, é faot deom ho trugérékaad, hwi a ra deom, épad ar vuhé-man, de voud lodeg de vadoù ho Rouantelezh