Pédenn-digor :

Doué oll-gelloudeg ha peurbaduz, on rénet betag eurusted ar baradouiz ; ma ta de benn ar vandenn, daousto d’hé goannedigezh, ér léh éma deit abarh tréhiuz hé bugul

Dré Jézus-Krist ho Mab, or Salvér hag on Doué, a viù genoh ha ged ar Spered santél, a oll viskoah de viruikén.             

 

Pennad tennet a Livr Obéroù an Apostoled (Ac 4, 8-12) :

 

Galvet dirag Kuzul Meur Izraël, Pier, lan ag ar Spered Santél a zisklérias dehé : “ Mistr ar bobl, ha hwi an dud kozh, chelaouet : tud a zo é klask penn genem ag ar vad on-es groeit d’un dén mahagnet hag ind a garehé gouied penaoz éma bet êseit dehon. Me hrei d’anaùein deoh-hwi ha de beb unan a bobl Izraël éma dré hanù Jézuz a Nazareth. Doué en-des eañ saùet a varù de viù; dré an hanù-sé éma bet gwelleit d’an dén hag a wélet aman divahagn. Ar Jézuz-sé a zo ar maen ha ne hwes ket vennet anehoñ én ho ti; eañ a zo neoazh ar gwir maen-korn. N’en-des ket a salvedigezh meid énno. N’en-des ket ér bed hanù erbed arall a hellehé mab-dén boud salvet drézoñ.

 

Psalm 117

 

Dré hanù Jézus éma reit deom, ar salvedigezh peurbaduz  

 

Mélet an Aotrou Doué; eañ a zo mad !

Peurbaduz é é garanté !

Laram, ni hag en-douj an Aotrou Doué,

Peurbaduz é é garanté !

 

Gwell é en em harpein àr an Aotrou Doué

Eid gortoz sekour ged an dud ;

Gwell é en em harpein àr an Aotrou Doué

Eid gortoz sekour ged tud oll-gelloudeg !

 

Ar maen en-des dilézet ar saùerion-tiér

A zo deit de voud ar maen-sôl :

Obérenn an Aotrou Doué é,

Ar burzhud édan on daoùlagad.

 

Hwi zo men Doué, ho mélein a hran,

Men Doué, hous inourein a hran !

Mélet an Aotrou Doué : eañ a zo mad !

Peurbaduz é é garanté !

 

Kentél tennet a lizhér ketan Sant Yann (1Jn 3, 1-2) :

 

Mem breudér a garanté,

Sellet pegen braz é, ar garanté en-des an Tad or lañet ; vennet en-des ma veem galvet bugalé Doué – hag éh om é vugalé. Chetu perag ne hell ket an dud on anzaù; rag ma n’o-des ket dizoleit Doué.

Me muian karet, goudé breman éh om bugalé Doué; mez ar pézh a vo ahanom n’hellam ket hoazh er gwéled splann. Ni er goui : a p’arriùo Mab-Doué é veem par dehoñ rag ma er gwéleem èl m’éma.

  

Alleluia

 

Jézus ar Bugul mad a anaù é zeved hag é zeved en anaù. Reit en-des é vuhé aveité.

 

 

Aviél revé Sant Iehann (Jn10, 11-18)

Jézuz a laré d’ar Juifed : « Mé é ar bugul mad, ar gwir bugul. Ar bugul mad a ra é vuhé aveid é zeved.

Ar gopraér, eañ, n’en-dé ket ar bugul, rag n’en-dé ket an deved dehon; pe wél ar blei é toned, éañ a laosk an deved hag a déh kuit; ar blei a skrap hag a zispenn an deved. Ar bugul-sé a déh kuit rag m’en-dé nameid ur gopraér ha n’en-dé ket é poén ag an deved. Mé é ar bugul mad; me anaù men deved ha men deved me anaù èl em anaù me zad ha ma en anaùan. Ha me ra mem buhé aveid men deved. Boud em-es hoazh deved arall ha n’en-dint ket ged ar vandenn-man. Reit é dein o dégas eùé devad ar rérall; ha kleùed a hreint mem boéh , ha ne vo kén meid ur vandenn ha kén meid ur bugul. An Tad em har rag rein a hran mem buhé hag hé adkeméran àrlerh. Hañi n’en-des gellet hé lemel azohein; m’hé ra é me unan. Me hell hé rein ha me hell hé hemér éndro : chetu ar gemenn em-es reseùet aberzh me Zad.

 

Pedenn àr ar provoù.

 

Plijet genoh, Aotrou Doué, ma hellehem rein berped deoh grésoù aveid mistériou ar Pask ; ma talhent d’ober énnom ho labour a salvedigezh ha ma veint aveidom ur vammenn diheskuz a leùiné.

Dré Jézus-Krist ar Salvér

 

 

Pédenn goudé ar gomunion :

 

Doué oll-gelloudeg ha bugul lan a vadelezh, plijet genoh diwall ged tinerded ho pugalé; ho-pes or salvet ged goed ho Mab : digoret deom de viùein euruz ér Baradouiz.

Dré Jézus-Krist ar Salvér