19ved sulieg
Pédenn-digor :
Doué peurbaduz hag oll-gelloudeg, hwi hag a hellam hanùein on Tad, lakeit de greskein én or halonoù ar garanté én ho kevér, eid ma véem ér stad de voud dégeméret un dé én ho paradouiz.
Dré Jézus-Krist ho Mab, or Salvér hag on Doué, a viù genoh ha ged ar Spered santél, a oll viskoah de viruikén.
Lénnadenn ar Livr ketan ar Rouané (1R 19, 4-8)
Ar profet Eli a déhas dirag fallanté ar rouanéz Jézabel ha kerhed a hras tro-an-dé én dézerh. Ean a azéas é dishéolenn ur hleu hag a houlennas ar marù én ur lared : « Breman, Aotrou Doué, ré zo ré. Keméret mem buhé ; ne dalvan ket gwell eid me zadoù. » Neuzé en em astenn a hras édan ur bod, hag en em lakas de gousked.
Mez chetu un ael d’en dihousk ha de lared dehon « Saùet ha dèbret ! ». Taolein a hras ur sell, hag éh oé, étal é benn, ur varaenn pobet àr an tan, hag ur podad deur. Eañ a zèbras, a évas, hag en em lakas éndro de gousked.
An ael en dihouskas aveid an eil gwézh, hag a laras dehon : « Saùet ha dèbret, pétremant é vehé ré hir an hent aveidoh. »
Eli a saùas, a zèbras hag a évas. Neuzé, kreñveit ged ar biùians-sé, eañ a gerhas épad daou-ugent dé ha daou-ugent noz betag Horeb, mañé an Aotrou Doué.
Psalm 33
Mad é an Aotrou Doué.
Gloér deoh-hwi, o men Doué
Me vennigo an Aotrou Doué é peb amzér
E vélasion a vo àr men divéz
Me rei gloér de men Doué
Revo ar ré beur doh me hleùed ha reveint él leùiné.
Meulet genein an Aotrou Doué
Kañam gloér d’é hanù, oll-àr-un-dro
Klask a hran an Aotrou Doué ; éan me respond
Ha éan me zenn ag oll ar spontoù.
Più bennag a sell dohton a lugerno
Heb seblant na treboulans àr é fas
Ur hêh dén a gri ; an Aotrou Doué er hleù
Eañ en denn ag oll é spontoù.
Ael an Aotrou Doué a zo é chom tro-ha-tro
Eid rein ar frankiz d’ar ré en douj.
Tañoeit ha gwélet : an Aotrou Doué a zo mad !
Euruz an hanni a gav énno é retirans
Lénnadenn Lihér Sant-Paol Apostol de gristenion Efez (Ep 4, 30-5, 2)
Mem bredér, de hortoz dé ho frankiz, reseùet e hues énnoh merch ar Spered Santél.
Lamet ag ho puhé ar péh a zo hwerùoni, fall imur, kounar, taoloù kri pé anjuli ha fallantéioù a beb sort. Béet étrézoh lan a larganté hag a tinérded. Pardonet étrézoh, unan doh an arall, èl an Aotrou Doué en-des ho pardonet dré ar Hrist.
Ya, klasket de obér èl Doué, pen-dé-gwir éh oh é vugalé karet.
Biùet ér garanté èl ar Hrist. Ean en-des or haret hag en-des um reit eidom én ur hennig de Zoué ar sakrifis a hellé plijein dehon.
Alleluia
Hwi a zo ar bara biù deit an Néañv, Salver Jézus. Più bennag a zébr ar bara-man, a viùo de virùikén
Aviél revé Sant Iehann (Jn 6, 41-51)
El m’en-doé laret Jézuz : « Mé a zo ar bara dichennet ag an Néañv », ar Juifed a vourbouté étrézé « Ha nen dé ket an dén-sé Jézuz, mab Jojep ? Ni a anaù mad é dad hag é vamm. Penaoz a hell éan lared : “Me zo dichennet ag an Néañv” ? Jézuz a laras dehé : “N’um glemmet ket étrézoh. Hañi ne hell doned devadon mar ne vé ket aberh an Tad hag en-des men dégaset, ha mé, m’er saùo a varù de viù d’an dé devéhan. Ar broféted en-des skriùet : « Ged Doué éan-mem é veint desket. »
Peb dén a zo é heuli gourhemennoù an Tad a za devadon. E guirioné, a-viskoah, hañi nen des gwélet an Tad, nameid an hanni a za aberh Doué ; nameidon en-des gwélet an Tad. »
Amen, amen a laran doh : an hanni a gred énnon en-des ar vuhé peurbaduz. Mé é bara ar vuhé. En dézerh en-des ho tadoù dèbret ar mann, ha marù int. Mez, ar bara-sé dichennet ag an Néañv, an hanni a zèbr anehon ne varùo ket. Mé é ar bara buhéuz dichennet ag an Néañv; mar dèbr unan bennag ag ar bara-sé biùein a hrei de virùikin. Ar bara hag a rein-mé a zo me horv reit d’an holl aveid en-devoud ar vuhé.
Pedenn àr ar provoù.
Aotrou Doué, reit e hues ar provoù-man d’ho iliz eid ma hello o hennigein deoh ; dégeméret ind eid ma teint de voud, dré ho kelloud, sakremant or salvedigezh..
Dré Jézus-Krist or Salvér
Pédenn goudé ar gomunion :
Revo ar gomunion-man én ho sakremant, Aotrou Doué, or frankiz hag or grouienn én ho kwirioné.
Dré Jézus-Krist or Salvér