Pedenn-Veur eid ar ré varù

Santél oh-hwi, Aotrou Doué,

ha déliet é de gement tra e-hues krouéet

kanein deoh meuleudi,

rag, dré ho Mab, or Salvér Jézus-Krist,

ha dré nerh ar Spered Glan,

é ret de beb tra buhé ha santelezh,

hag é talhet de zastum a beb tu ur bobl a vo ho hani,

ur bobl a gennigo d'ho hanù santél dré ar bed a-bèh

ur brovadenn divlamm.

 

A galon izét, é houlennam enta genoh, Aotrou Doué,

ma vo sakret ha santélleit ged ho Spered Glan

ar provoù-man on-es dégaset deoh,

 

eid ma teint de voud Korv (+) ha Goèd ho Mab,

or Salvér Jézus-Krist,

ean hag en-des gourhemennet deom

lidein ar sakrifis-man.

 

An noz man dé gwerhet, Jézus a gemér bara,

hag én ur rantein deoh gloér ha trugéré,

er bennig, en torr étré é zisipled én ul lared :

 

Keméret oll ha dèbret,

rag kement-man zo me horv

lakeit d'ar marù aveidoh.

 

Elsé hoah, goudé koén, é kemér ar halis,

hag én ur rantein deoh gloér ha trugéré,

er bennig hag er ra d'é zisipled én ul lared :

 

Keméret oll hag ivet

rag hennen a zo kalis men Goèd,

Goèd an emgleù neùé ha perbaduz

skuillet aveidoh hag aveid an dud

eid pardon ar péhédoù.

Groeit kement-man aveid lidein ar chonj ahanon.

 

(Béleg : Chetu aman mistér ar Fé

Pobl : Kanenn goudé saù korv Doué)

 

 

 E terhel chonj enta, Aotrou Doué,

ag ho Mab en-des gouzanùet

é Basion aveid or salvedigezh,

a zo deit a varù de viù,

ha ged gloér saùet d'an Néañv,

én ur hortoz eùé ma tei éndro é fin ar bed,

é kennigam deoh aveid ho trugérékad

ar sakrifis-man biù ha santél.

 

Taolet, ni ho ped, ho sell madelezhuz

àr brovadenn ho iliz,

aveid anaouid énni sakrifis ho Mab

en-des reit deom éndro ho pardon.

A pe veem bet maget ged Korv ha Goèd or Salvér,

reit deom ar hrès de voud lanet ged ar Spered Santél,

eid ne hreeem mui

nameid ur horv hag ur spered hebkén

é Jézus-Krist, on Aotrou.

 

Reblijo geton rein deom santelezh,

ma helleem-ni eùé boud ur brovadenn peubaduz,

ka kaouid lod é eurusted ar baradouiz,

ged ar Werhiéz gloriuz Vari, Mamm de Zoué, Sant Jojeb hé fried

an Apostoled hag ar Vartired santél, Sant(ez)...

hag an oll Sent a zalh de bedein diragzoh aveidom.

Groeit eùé, ni ho ped, Aotrou Doué,

ma talvo ar sakrifis-man, sakrifis ar pardon, hag an Emgleù neùé,

de zégas d'ar bed a-bèh peah ha salvedigezh.

 

Kriùeit fé ha karanté ho iliz

hed hé ferhinded àr an douar.

Reit nerh d'ho servitour, on Tad santél, ar Pab Franséz,

on Eskob Raymond, an oll eskobed ha béléion.

Sekouret ar bobl a-bèh e-hues dibabet aveidoh ;

ho tud fidél tolpet diragzoh eid ho servijein :

chelaouet o fedennoù ha chomet geté d'o gouarantein ;

ho pugalé dispartiet a beb tu :

galùet ind devadoh, Tad madelezhuz,

ma veint dastumet én ho pobl.

 

 

Ho-pet chonj ag ho servitour(éz)

e-hues galùet (hiziù) ag ar bed-man devadoh :

pe dé bet badéet é marù Jézus,

ha p'en-des (p'hé-des) a-unan geton gouzanùet pasion

reit dehon (dehi) boud lodeg eùé

é Adsaù ho Mab d'ar Vuhé,

an dé-sé ma tei or horvoù distér

de voud hanval doh é Gloér gloriuz,

pe vo galùet ar ré varù de seùel ag an douar.

 

Ha plijet genoh én ho madelezh

rein d'or breudér treménet,

ha de gement dén just en-des kuiteit ar bed-man,

un dégemér mad én ho rouantelezh ;

éno eùé on-es espérans

de viùein geté unanet oll de virùikén,

ha de voud goalhet ged splanndér ho kloér.

Hwi a sého neuzé on daroù ag on daoulagad,

rag dré ho kwéled èl ma oh, Hwi on Doué,

é teem de voud hanval dohoh,

hag é talheem d'ho meulein de virùikén,

 

 

 

dré or Salvér Jézus-Krist,

rag drézon é skuillet àr ar bed

oll vadoù ged larganté.

 

(Dré ho Mab geton hag ennon       R/Amen

Deoh hwi Doué en Tad oll gelloudeg, a-unan ged ar Spered Santél      R/Amen

Peb gloér ha peb inour a oll viskoah de viruikén      R/Amen )